کابل ایئر پورٹ کی سیکورٹی اور ترکی

امریکہ اور اس کے اتحادی نیٹو ممالک گزشتہ 20 سال سے افغانستان میں موجود ہیں اور اب آخر کار تھک ہار کے ان تمام ممالک نے یکم مئی سے افغانستان سے اپنے انخلا کا عمل شروع کیا ہے جو 11 ستمبر 2021 تک نیو یارک میں ورلڈ ٹریڈ سینٹر کی عمارتوں اور واشنگٹن میں پینٹاگون پر حملوں کی 20 ویں برسی کے موقع پر مکمل کر لیا جائے گا۔ امریکہ اور نیٹو ممالک کے انخلا کے موقع پر اس وقت سب سے اہم ایجنڈا افغانستان، خاص طور پر کابل ائیر پورٹ اور غیر ملکی سفارتخانوں کی سیکورٹی ہے کیونکہ طالبان اب ویسی ہی طاقت پکڑتے جا رہے ہیں جو انہوں نے امریکہ اور نیٹو کے اتحادیوں کے افغانستان پر قبضہ کرنے سے پہلے حاصل کر رکھی تھی۔ اس سلسلے میں سب سے اہم مقام کابل کا ’’حامد کرزئی بین الاقوامی ہوائی اڈہ‘‘ ہے جس کی سیکورٹی کے فرائض ترکی کو سونپے جا رہے ہیں۔ اس سلسلے میں گزشتہ دنوں امریکی وزارتِ دفاع کے ترجمان جان کربی نے کہا کہ ترکی کی وزارتِ دفاع کے ساتھ ہونے والے مذاکرات کے نتیجے میں کابل کے ہوائی اڈے کی سیکورٹی ترکی کے حوالے کرنے پر اتفاقِ رائے پایا جاتا ہےاور اس سلسلے میں تفصیلات طے کی جا رہی ہیں۔

امریکہ اس سلسلے میں ترکی کو ہر طرح کی مالی اور سفارتی امداد فراہم کرنے کے لئے تیار ہے۔ گزشتہ ہفتے نیٹو سربراہی اجلاس کے موقع پر صدر رجب طیب ایردوان اور امریکی صدر جو بائیڈن کے درمیان ملاقات کے دوران بھی اس مسئلے پر تبادلہ خیال کیا گیا تھا اور صدر بائیڈن نے ترک صدر ایردوان کو افغانستان سے امریکی اور نیٹو افواج کے انخلا کے بعد کابل کے ہوائی اڈے پر سیکورٹی کی ذمہ داری ترکی کو دینے کی سرکاری طور پر پیش کش کی جسے ترک صدر نے بخوشی قبول کر لیا۔ ترکی اور افغانستان کے درمیان تاریخی تناظر میں بھی بڑے گہرے تعلقات چلے آرہے ہیں۔ افغانستان میں نیٹو کے دائرہ کار میں یہ ترک فوجی دستے ہی تھے جن پر افغان عوام گل پاشی کرتے رہے ہیں اور ترک صدر کو افغانستان میں بے حد پسند کیا جاتا ہے۔

صدر ایردوان کو طالبان کی جانب سے بھی بڑا پسند کیا جاتا ہے بلکہ صدر ایردوان نے اپنے نوجوانی کے ایام میں طالبان کی ابتدائی تحریک کی کھل کر حمایت کی تھی اور طالبان تحریک کے کئی رہنمائوں سے ملاقاتیں بھی کی تھیں جس پر صدر ایردوان کو برسر اقتدار آنے کے بعد تنقید کا نشانہ بھی بنایا گیا تھا تاہم صدر ایردوان اب بھی طالبان کے بارے میں قوانین کی پاسداری کی صورت میں نرم گوشہ رکھتے ہیں۔ لیکن ازبک رہنما رشید دوستم کی کھلی حمایت کرنے اور ترکی میں رشید دوستم کے طویل عرصہ قیام کے دوران انہیں ہر ممکنہ امداد فراہم کرنے کی وجہ سے طالبان ترکی سے ناراضی کا بھی اظہار کرتے ہیں اور چند ماہ قبل افغانستان کے ہمسایہ ممالک کی بین الاقوامی کانفرنس استنبول میں منعقد کرنے کا جو اعلان کیا گیا تھا، طالبان نے اپنی اسی ناراضی کے باعث اِس میں شرکت نہ کر نے کا اعلان کر دیا تھا چنانچہ ترکی کی میزبانی میں یہ بین الااقوامی کانفرنس منعقد نہ ہو سکی۔

گزشتہ دنوں دوحہ میں طالبان کے ترجمان، سہیل شاہین نے ترکی کی جانب سے کابل کے ہوائی اڈے کی سیکورٹی کے فرائض ادا کرنے سے متعلق بیان دیتے ہوئے کہا کہ جس نیٹو کے فوجی افغانستان سے اپنا انخلا عمل میں لا رہے ہیں، ترک فوجی دستے بھی اس انخلا کا ایک حصہ ہوں گے اور ان کو بھی افغانستان سے باہر نکلنا ہو گا۔ انہوں نے کہا کہ ترکی گزشتہ 20 برسوں سے نیٹو افواج کا حصہ رہا ہے، لہٰذا انہیں 29 فروری ، 2020 کو امریکہ کے ساتھ معاہدے کے مطابق افغانستان سے اپنا انخلا شروع کر دینا چاہئے تاہم افغانستان میں ایک اسلامی حکومت کے قیام کے بعد ترکی، جو عالمِ اسلام کا بہت اہم ملک ہے اور اس کے افغانستان کے ساتھ تاریخی تعلقات ہیں، کے ساتھ قریبی اور دوستانہ تعلقات کو نئے سرے سے استوار کیا جائے گا۔ امریکہ، نیٹو اتحادی ممالک، افغان حکومت اور ملک کی سب سے موثر اورقوت طالبان کے ساتھ امن مذاکرات کا سلسلہ گاہے گاہے جاری رہا لیکن یہ مذاکرات کبھی نتیجہ خیز ثابت نہیں ہوئے اور امریکی اور نیٹو فوج طالبان سے امن معاہدے پر پہنچے بغیر افغانستان سے انخلا کرنے کی تیاری کر رہی ہے جس سے افغانستان کی صورتِ حال بگڑتی چلی جا رہی ہےاور اس انخلا کے بعد کابل کےبین الاقوامی ہوائی اڈے کی سیکورٹی کا معاملہ بھی خطر ناک صورت اختیار کر جائے گا ۔ 

اس وقت نیٹو کے دائرہ کار میں افغانستان میں ترک فوجیوں کی تعداد 500 کے لگ بھگ ہے اور ترکی کو اس تعداد میں اضافہ کرنے کی تجویز پیش کی گئی ہے اور ترکی اس پر ابھی سے اپنی تیاریوں کا آغاز کر چکا ہے لیکن ترکی کی حزبِ اختلاف نے صدر ایردوان کے اس فیصلے پر شدید تنقید کرتے ہوئے اسے ترک فوجیوں کے لئے خطرناک قرار دیا ہے۔ ترک صدر ایردوان نے کابل کے ہوائی اڈے کی سیکورٹی کیلئے پاکستان اور ہنگری کے ساتھ مل کر کام کرنے کی پیش کش بھی کی ہے۔ صدر ایردوان اس بات کو اچھی طرح سمجھتے ہیں کہ پاکستان کی حمایت اور مدد کے بغیر کابل کے اڈے کی سیکورٹی قائم کرنا ممکن نہیں ہے، اسی لئے انہوں نے اپنی پریس کانفرنس میں پاکستان کے تعاون سے کابل کے ہوائی اڈے کی سیکورٹی کا بندو بست کیے جانے اور تمام غیر ملکی سفارت خانوں کی سیکورٹی کو بھی یقینی بنانے سے متعلق آگاہ کیا ہے۔ اب دیکھنا یہ ہے کہ حکومتِ پاکستان کابل کےہوائی اڈے کی سیکورٹی کس طرح ترکی کے ساتھ مل کر یقینی بناتی ہے؟

ڈاکٹر فر قان حمید

بشکریہ روزنامہ جنگ